Hmeichhe naupang na takin khawih hliamx

Aizawl: Power Grid quarter, Tuivamit-a hmeichhe naupang pakhat chu Inrinni khan a awmna chin hriat lohin a bo a, a zanah khawtlangin zawng nghalin Pathianni zing dar 1:00 vel khan an In atanga hla vakloah thi chhawnga chhar a ni a. Tun thlengin amah hi nikhaw hrelovin ala awm niin thudawn a ni.

Evening Post thudawn danin he hmeichhe naupang, kum li leh a chanve mi hi Inrinni chhun khan an chenna bul lawka Children’s Park-ah a thiante pahnih nen an infiam a, a thiante hian a awmna chin an hriat tak loh avangin an kalsan a, chawhnu dar 3:00 velah a bo thu hi a chhungte’n an hre chauh a, Inrinni zan la la hian YMA leh police lamin an zawng nghal a ni.
Khawtlang hian an infiamna atanga hmar lam, Rangvamual lam ep, ramruak laiah thichhawngin an chhar a, a bek veilamah hliam na tak a tuar a, a luruh hi a khi deuh niin thudawn a ni a. A khawihtu hian pawngsual tum niin a lang a, "A hmeichhiat thianghlimna erawh khawihchhiat a ni chiah lo niin doctor ten an enfiahnaah chuan a lang," thudawnna chuan a ti.
He hmeichhe naupang khawihtu hi police te chuan an zawng nghal a, rinhlelh theih awm mi thenkhat pawh an la tawh nghe nghe a ni. (Courtesy Evening Post)