Mizoram chhunga ramdangmi lo lut hi..

Kan hotuten kan ram zimte thil phal taka an lo theh hluam hluam ka hriat hian ka tah a chhuak tlat. Mizoram leh hnam hmangaih taka inhre vek kan ni a. Chuvangin kan sawi ve tak tak teh ang. In ngaihdan anih loh chuan in sawisel hma in lo ngaihtuah hmasa ve phawt rawh u. Kan ram te tak te chiah hi he khawvel ah hian ‘kan ram’ kan tih ve theih omchhun ani a, midang lo mikhual huau huau na tur ani lo. Engvangin maw??

Statistics-a a landan chuan nikum 2008 chhung ringawt khan North East-ah hian civilian leh sipai tiam in mi 378-in terrorists avangin an nunna an chan a, chutih laiin terrorists thi zat ah chuan 515 anga tarlan ani. Hriat teuh angin thizat mai bakah hliam tuar eng emaw zat tarlan loh khawilam ve ve a awmte nena chhut phei chuan hei ai hian an tam fe tura chhut ani a, chutih lai chuan hel pawl awmzata chhut chu Manipur-ah 47, Assam-ah 37, Tripura-ah 25, Meghalaya leh Nagaland-ah 4 ve ve leh Mizoram-ah 2 anga tarlan ani a.

Heng hel pawl kan tih ho te hian ram chhung atangin tanpuina hmu bawk mahse chumi piah lamah chuan ramdang mi, Bangladesh leh Pakistan lam atang ten puihna nasa tak an dawng anga hriat ani a, chumai bakah Intelligence Bureau-in a tarlan dan chuan tunah hian North East state hi Jammu and Kashmir dawt chiah a ram ralmuanglo ber leh hel pawl chet tlatna tam ber hmun ani a, chumai bakah tun ai hian a chhunga mipui cheng te tan hian harsatna leh chhiatna nasa zawk thlen tu tura hmuhlawk ani.

India ram sawrkar-in a buaipui ber pakhat chu Indo-Pakistan border hi ani a, tunah ringawt pawh hian kan ram thenawm hnai West Bengal ah ringawt pawh hian Bangladeshi ho tam lutuk avangin a ram mipui ten awmna tur an buai tawh a, Assam-ah pawh chutiang bawkin a tira an mikhual te avangin NE-a ram ralmuang lo ber anih phah a. An ram chhung ngau ngau a hel pawl ve te bakah hetianga hel pawl tawm ru dang ho avangin Manipur nise a mipui ten hel pawl hnenah loh theihlovin sawrkar hna thawk zawng zawng tiam-in 20-25% ‘tax’ an pek phah a, hetiang ram dang atanga lo lut hi vaibelchhe 2 vel anga chhut anni a, hnawtchhuak tur hian kum 200 vel a ngai tura ngaih a ni.

Chutih laiin, Mizoram chhunga Burmese border lam atanga lo lut thla hi kum 2004 daih a survey-ah pawh khan 65,000 chuang hreta chhut ani. March 2008-ah khan survey chuan Mizoram chhunga lo lut Burmese immigrants ho hi nikhat 2,000 vel ang zela chhut anih laiin Bangladesh lam atanga lo lut hi nikhat-ah 1500 vel ang zel-in a chhut bawk a, hei bakah hian Manipur lam atanga ‘kan unaute’ lo lut nitin 1000 tling lo deuh anga chhut ani a, hei mai bakah hian Silchar lam atanga lo chho hi an awmreng bawk a, chuti chuan kan hnam population mai bakah kan birth and death rate chhut ta ila, tun atanga kum 20-30 inkar-ah hi chuan a ram neitu ‘Mizo’ te hian ram chantur engmah a lawi kan nei tawh lovang. Chuti chung chuan ‘kan unaute’ la ‘mikhual’ hi kei chu hnam phatsanna LIAN ber ah ka ngai. Hnamdang zinga mikhual hrehawm zia kan hre ngai anih vaih chuan kan hmangaih, kan nupui fanau leh tuchhuan te’na ‘kan ram’ tihtur an neilo tur hi ka phal thei thlawt lo.

Mizo hnam hi a la naupang a, foreign relations kan la thiam lo mai pawh nilovin kan hre lo. USA, khawvel-a ram changkang ber hi enteh, tuna economic crisis-ah hian a ram neitu te zawk hi ania hnathawh tur neilo tam zawk. Engvang nge kan tih chuan, a tirah midang an luhtir huau huau a, hna hrehawm deuh an thawk peih lova, ‘hlawhfa’ an chhawr a, an ‘hlawhfa’ Indian ho te khuan asin Canada-ah pawh ram neitu te chhawr tawh hrep hrep tawh zawk mai pawh nilovin an second official language-ah punjabi asin an hman tawh.

Chumai a la nilo, Mizoram chhungah sawi leh ta ila, tunah ringawt pawh hian Manipur, Burma leh ram dang atanga lokal engzat hian nge kan ram chhungah a nghet a in leh lo nei tawh. Kan la en liam mai mai chu ania leh!!!

Christian kan inti a, Bible kan chhiar tluk tluk a, kan Pathian hi Israel hote Pathian kha anih ngai chuan hnamdang ho nena in mikhual kual vel leh inchiahpiah deh duah a lawm vur vur thu in hmu em?

Ram humhalh chungchang-ah hian ‘excuse’ a awmlo. Anni chu an chuti khati alawm’ti ho phei hi chu chhuih chawrh mai ka duh, ram pakhat zim lutuk, world map-ah phei chuan pentui hmawr khat vel lek emaw a lian kan nei a, kan ka thil phal em em mai lehnghal a!! A lokal leh mi be tlawn thiam deuh, sum min pe thei tur emaw term khat dang min eiruk tir leh thei tura kan rin deuh apiang kan neih tha ber ber kan lo sin tir a, Kan hmanlai lal huaisen ho kan chhuang a, thenkhat-in “Zam ve ngailo Ropuiliani” kan tia kan zai kur dup a, lo tho leh ta chiah se chuan kan ram hotu thenkhatte (an vai pawhin an hian anni thei maithei) hi chu a chhipthlak pawp pawp duh ang.

Kan hnam hruaitu te hian Indian Current Affairs leh World News te hi local channel ‘mizo idol’, ‘football’, etc te aia an en tam loh pawh a a tluk vel tala an en a an hriat ve nan hian chawngheia tawngtai rualna hi neih mai ka duh hial ani.

Sawi tam tulh tulh lan hian rilru a na tulh tulh a, duh ang pawhin a sawi theih loh. Ka ngaihdan chuan, ‘kan unaute’ hi kan hmangaih ngai anih chuan an ram chhung ngeia an mahni buaina hi an chinfel theihnan tawngtai sak ila, chutiang bawkin min hmangaih ve annih chuan an buaina hi kan ramchhung-ah lo pu lut ve lo tur-in border-ah hian lo hnar ngauh ngauh mai tur. Google- ah te hian ‘number of illegal immigrants in india’ tih vel-in emaw, ‘terrors in north-east’ tih vel te hian han enkual ve teh u, a na ngawih2 mai. Ani mai, Mizoram chhunga hnamdang awm ho pawh hi thawn bo vek tur.

Khati laia cynics ho tan khan… aw, an tel lovin kan awm thei. Mihring hi chu midang emaw thildang emaw rin tur a awmloh na na na hi chuan kan peih emaw peihlo emaw kan thawkchhuak ziah. Thatchhiat lutuk vanga ei tur nei lova thi ka la hre lo. Kan hnam kan ral zo dawn, khawngaih takin ram dang mi hi chu la lut/luhtir phal tawh lo te ang u!!