Ram a changkang zel a, khawvel ram hrang hrangte chu internet hmangin inthlunzawm a ni tawh a, chanchinthar ber ber pawh internet kaltlang hian computer-ah chhiar zung zung theih a ni. Chu changkanna behchhan chuan website chi khat blog site siam a ni thin a, chutah chuan mi chi hrang hrangin comment-te an ziak thin, mahse duh dan dan anga comment ziah chu a him tawh lo a, tun hnai mai khan Supreme Court chuan blog-a duh duh comment chu court-ah thiam loh chantir hial theih an nih thu an sawi.
Source:Evening Post
Kerela rawlthar Ajith D kum 19 mi chuan a blog site-ah Shiv Sena dodalna lam a ziak chiam a, hetah hian mi chi hrang hrangin comment an ziak a, hei hi Shiv Sena chuan an la thutak hle a, Kerela State Secretary chuan FIR a thehlut ta hial a,’mi rilru a tihnat avangin’ tiin case siam a ni ta a, he rawlthar hian ukil rawih tur pawh a hmu meuh lo a, atan an ding duh lo.
Hetiang case ang deuh hi nikum lam khan Mizoramah a thleng tawh a, Chiahpuam boruak a vanglai tak khan Chief Minister hlui adviser pakhat chu Mizo blog pakhat
www.misual.com-ah puhna diklo tak hmanga comment pek a ni a, he comment avang hian adviser hlui rilru hi a na hle ni tur a ni FIR pawh a thehlut nghe nghe a, mahse he case hi kalpui zui a ni ta lo niin misual.com neitu Benjamin Rualthanzauva chuan Evening Post a hrilh.
“Tawngkam mawi lo tak taka comment hi blog-ah hian Mizote hian kan uar hle a, hetiang kawngah hian awareness kan neih that a ngai hle a ni,” tiin Benjamin-a chuan a sawi bawk, ani hi tunah hian Bangalore-ah HP company-ah Engineer hna a thawk mek a, internet blog misual.com hi mipui tana a hawn (Community Forum) a nih atangin tlawhtu a ngah hle a, Mizo blog-ah chuan tlawhtu nei tam ber niin ni khatah ‘hit’ sing chuang a awm thin.
Mizo blog zinga hriat hlawh ber pakhat
www.buannel.com neitu Lalduhsaka chuan,”Comment thalo tak tak a tam hi ka hlau a, hei vang hian blog ka siam dawn pawh hian ka hlauthawng ru hle,” tiin a sawi a, ani chuan comment avanga harsatna an la tawh loh thu a sawi a,”Comment hi kan duh vak lo a, hei vang hian topic comment vak vak pawh a tlem hle,” tiin Evening Post a hrilh.
Kerela lama blog-a comment an khin avang hian India ramah chuan blog chungchang hi inhnialna a awm mek a,”Legal debate” a ni tiin Bengjamin Rualthanzauva chuan a sawi a, nimin mai khan Times of India chuan blog comment hi khin theih a ni lo tih lam hawi zawngin a tarlang tiin a sawi a,”Tun lai hian print media leh internet blog hrang hrangah blog comment khin leh thiam loh chan theih chungchang hi inhnialna lian tak a ni mek,” tiin a sawi bawk.
Internet blog hi website pangngai a ni a, hetah hian community blog a nih chuan a tlawhtute hian topic leh news-te an post thei a, chung an post-te chu blog neitute chuan lo thlifimin blog-ah chuan an tarlang ta thin a ni. Blog-a post an tarlante chu blog site entu apiang chuan a topic hnuaiah an duh ang zawngin an comment thei a, chu an comment-ah chuan hminglem an hmang thin a, an duh duh an sawi thin a ni.
“Hminglem hmanga duh duha comment hian mi pawite sawi an ching thin a, hei hi a tha lo a, internet a nih avanga duh duh sawi hi chhia leh tha hriatna hmang pawhin chin loh a tha,” tiin Lalduhsaka chuan a sawi.
www.misual.com comment avanga FIR thehluh chu a titu awlsam taka an hriat avangin hmalak chhunzawm a ni lo a, hei hi Mizo blog-a comment avanga case awm hmasa ber niin a ngaih theih a, India ramah chuan hetiang thil titute hi na taka hrem theih a ni tawh dawn a, fimkhur pawh a ngai tawh hle dawn a ni.
[http://buannel.com]
